新0既一年貓仔先祝大家心想事成, 開開心心. 近期貓仔小有地睇左三個樂壇頒獎禮 (CCTVB撞左曼巿大戰, 無計..), 今年"那些年"同"年少無知"真係紅到街知巷聞, 貓仔睇完"那些年"...抱歉...無想像中咁激動...但相反聽左首主題曲, 印象好深刻...大概係因為歌詞比到貓仔好多懷緬同幻想空間...我相信好多人心目中都有一個沈佳宜, 只係佢會係不同形象同情景出現. 而係平衡時空入面, 大家都會希望"沈佳宜"幸福快樂.

"那些年錯過的大雨, 那些年錯過的愛情, 好想告訴你, 告訴你我沒有忘記. " 以上0既幾句其實除左紅遍港澳台之外, 亦都傳到英國. 曼巿大戰開賽前30分鐘, 貓仔見到曼魚出場名單有個"22 Paul Scholes" ...貓仔都係度諗緊係咪眼花定係Soccernet 傻左呢...結果, 費SIR 話比大家知佢真係無忘記那些年史高C係曼聯中場0既重心作用, 而且仲要去到球季過左一半都仲未搵到替補人選. 結果, 只好將佢心目中0既沈佳宜再一次從平衡時空中帶到現實世界. 最終曼聯帶點冷味中勝出, 但當然都要多謝球証一早贈慶請左甘賓利呢位表演嘉賓提早離場...而另一位沒有忘記那些年0既人, 大家當然會估到...就係雲加啦...而佢心目中0既沈 佳宜仲係返到呢個景物依舊人面全非0既地方, 用左唔夠十分鐘, 就話比大家知" 好想再回到那些年的時光", 結果憑住佢0既一箭定江山, 幫左滿頭白髮眉頭緊鎖左足足半年0既柯騰過左一關. 結過呢兩位暫時係英超在任最長0既領隊係大家面前話左比大家知原來"那些年"係可以再一次實現, 只係在於你有冇勇氣去實踐. 因為有時世俗眼光, 並唔係你肯撲上前攬住新郎哥錫左5分鐘, 大家就一定以感動0既眼淚再報以掌聲回報. 就好似比賽之後就有報紙話費SIR係掩耳盜鈴, 雲加仍然都係故步自封. 但貓仔會話有時大家或者未感受到當中苦衷同含意0者, 如果唔係九把刀話比大家知柯騰錫個新郎哥0既含意, 大家或者到而家都當個個係一個笑位吧!

每 個人都有一個唔想忘記0既那些年, 可能係返學0既日子, 同女朋友/老婆初相識0既日子, 甚至係好多個"第一次"0既感覺. 只可惜生活是一堆折挫, 只可惜生命是定必須妥協, 所以好多野都會慢慢淡忘甚至迷失. 但既然"那些年"總是感覺清新, 令人回味...何不找個時間懷緬一下...最少再比機會大笨旦係平衡時空再會一次"沈佳宜"吧.

就用一首歌時間...

http://www.youtube.com/watch?v=xWzlwGVQ6_Q